دۆناڵد ترەمپ، سەرۆکی ئەمریکا، هەڕەشەی ئەوەی کرد کە ئەگەر سوڵتاننشینی عومان ببێتە ڕێگر لەبەردەم ڕێکارەکانی واشنتن لە گەرووی هورمز، ئەوا وڵاتەکەی بۆردومان دەکات. ئەم لێدوانەی ترەمپ لە میانی وەڵامدانەوەی پرسیارێکی کەناڵی "فۆکس نیوز" هات سەبارەت بەو دانوستانانەی کە لە نێوان تاران و مەسقەتدا بەڕێوە دەچن بۆ ڕێککەوتن لەسەر ڕێڕەوی گواستنەوەی وزە.
تراي یینگست، پەیامنێری فۆکس نیوز، ئاشکرای کرد کە کاتێک لەبارەی گفتوگۆکانی ئێران و عومان پرسیاری لە ترەمپ کردووە، سەرۆکی ئەمریکا بە ڕاشکاوی وتوویەتی: "ئەگەر هەر ئاستەنگێک لە لایەن عومانەوە دروست بکرێت، ئەوا بە سەختی بۆردومانیان دەکەین." یینگست ئاماژەی بەوە کرد کە ئەمە پەیامێکی ڕاستەوخۆ و هۆشدارییە بۆ مەسقەت تاوەکو ڕێگری لەو گەمارۆ دەریاییە نەکات کە ئەمریکا بەسەر ئێراندا سەپاندوویەتی.
ئەم هەڕەشانە لە کاتێکدایە کە ترەمپ لە چەند ڕۆژی ڕابردوودا چەندین جار دووپاتی کردەوە کە وڵاتەکەی "کۆنتڕۆڵی تەواوەتی" گەرووی هورمزی کردووە و تەنانەت ئاماژەی بەوەش کردبوو کە لەوانەیە گەرووەکە وەک خاکێکی ئەمریکی بناسێنێت. لە بەرامبەردا، بەرپرسانی ئێران ئەم لێدوانانەیان ڕەت کردووەتەوە و دەڵێن تاران کۆنتڕۆڵی گەرووەکە ناکاتە قوربانی، کە لەوەتەی دەسپێکی جەنگ لە 28ی شوباتی ڕابردووەوە بە کردەیی داخراوە.
لە ئێستادا تاران و مەسقەت خەریکی گفتوگۆن بۆ دیاریکردنی ڕێڕەوێکی نوێ؛ ئێران داوای ڕێڕەوێکی باکووری دەکات کە بە کەناراوەکانی خۆیدا تێپەڕێت، لە کاتێکدا عومان پێشنیاری ڕێڕەوێکی باشووری کردووە. ئیسماعیل بەقایی، گوتەبێژی وەزارەتی دەرەوەی ئێران، جەختی کردەوە کە گفتوگۆکانیان لەگەڵ عومان "جیدییە" و کار بۆ گەیشتن بە ڕاگەیەندراوێکی هاوبەش دەکەن کە بەرژەوەندییەکانی هەردوولا و ئاسایشی دەریاوانی بپارێزێت.
سەرۆکی ئەمریکا لە بەشێکی دیکەی قسەکانیدا داوای لە ئێران کرد کە "ئاڵای سپی تەسلیمبوون" بەرز بکاتەوە. ترەمپ ئاماژەی بەوە کرد کە هیچ پەلەیەکی نییە بۆ گەیشتن بە ڕێککەوتن بۆ کۆتاییهێنان بە جەنگ، و وا دیارە ستراتیژیی وڵاتەکەی بەرەو زیادکردنی فشارە ئابوورییەکان دەگۆڕێت لە جیاتی هێرشی سەربازیی نوێ، ئەمەش بەهۆی نزیکبوونەوەی هەڵبژاردنەکانی نۆرەیی لە مانگی تشرینی دووەمدا کە تێیدا جەنگ جەماوەرییەکی کەمی هەیە.
لە کۆتایی لێدوانەکەیدا، ترەمپ هەبوونی کەناڵێکی پەیوەندیی لەگەڵ سوپای پاسدارانی ئێرانی پشتڕاست کردەوە، کە واشنتن وەک ڕێکخراوێکی تیرۆریستی ناساندوویەتی. سەرۆکی ئەمریکا بە شێوازێکی تانەئامێز وەسفی سەرکردەکانی سوپای پاسدارانی کرد و وتی: "ئەوان یاریزانی یەکجار لێهاتووی پۆکەرن، بەڵام خەریکە دەمرن." ئەم لێدوانانە نیشانەی توندبوونەوەی زیاتری زمانی دیپلۆماسیی ئەمریکایە بەرامبەر بە هەوڵە ناوچەییەکان بۆ چارەسەری قەیرانی هورمز.
