باسم محەمەد خضەیر عەبادی، وەزیری نەوتی عێراق، ڕۆژی سێشەممە 7ی تەمووزی 2026، لە کۆبوونەوەیەکی فراواندا لەگەڵ بەڕێوەبەرانی دارایی، یاسایی و چاودێریی کەرتی نەوت، جەختی لەسەر پاراستنی سامانی گشتی کردەوە و ڕایگەیاند کە "پارەی گشتی هێڵی سوورە" و نابێت بە هیچ شێوەیەک بەفیڕۆ بدرێت.
وەزیر ئاماژەی بەوە کرد کە ئەم کۆبوونەوەیە وەک هەوڵێکە بۆ ڕاستکردنەوەی ڕێڕەوی کارگێڕی، دۆزینەوەی چارەسەر بۆ قەیرانەکان و بنبڕکردنی گەندەڵی لە ناو دامەزراوە نەوتییەکاندا.
وەزیری نەوت ئاماژەی بەوە کرد کە حکوومەت جەبهەیەکی بەهێزی دژی گەندەڵی کردووەتەوە و قۆناغی داهاتوو قۆناغی هەڵسەنگاندن و چاکسازی دەبێت. عەبادی وتی: "چاکسازی پەیامێکی ئاسمانی و زەوینییە و پاراستنی ئەم ئەمانەتە ئەرکی هەمووانە." هەروەها داوای لە فەرمانبەران کرد کە ئەرکەکانیان بە باشترین شێوە جێبەجێ بکەن و لە بەرامبەردا حکوومەت ماف و شایستەکانیان بەپێی ئەزموون و لێهاتووییان دابین دەکات.
وەزیری نەوت داوای لە دەزگا چاودێرییەکان کرد کە ڕۆڵی کارای خۆیان بگێڕن لە پاڵپشتیکردنی بەڕێوەبەرایەتییە باڵاکان، لە ڕێگەی بەکارهێنانی ڕێکارە یاساییە دروستەکان بۆ پەرەپێدانی بەرهەمهێنان و پاراستنی دەستکەوتەکان. لە کۆتایی کۆبوونەوەکەدا، دەرگای گفتوگۆ بۆ ئامادەبووان کرایەوە تاوەکو پێشنیار و سەرنجەکانیان بۆ بەدیهێنانی شەفافیەت و کارکردن بەوپەڕی دەستپاکی و ڕوونییەوە بخەنە ڕوو، بە ئامانجی سەرخستنی هەوڵەکانی وەزارەت لە پەرەپێدانی سامانە نەوتییەکاندا.
